網紅的藏寶箱好多時，我之所以會寫一個食譜，源於唔忿氣，就好似呢個抹茶卷。
點解焗完表面唔綠？點解一定要用奶粉？點解一定要用忌廉？我要寫出焗完翠綠、減糖、唔使牛油忌廉，但醬料夠甜又滑口嘅食譜。
埋首寫咗好耐，好記得個醬我係由50克糖，逐少逐少咁減，終於搵到個方法，減到剩返20克都仍然夠甜、茶味又香。至於個卷，要寫到唔裂好容易，但要學生做完都唔裂，就一定要設計做法，同埋諗下點教佢哋關於打蛋白、同埋抹茶嘅理論，令佢哋明白咗之後，識得用返喺實習上。
記得當初開呢班之前，我試咗好多款抹茶粉，有啲平到好離譜，有啲貴到好肉痛，最後，我決定喺日本訂一款A級烘焙專用、可接受較高溫度嘅。又好記得喺疫情初期，呢個茶商拒絕出口，我立即寫咗成千字嘅電郵過去，講出自己點樣捱到出道、到被逼開教室繼續事業嘅心路歷程，希望佢哋睇完之後，可以繼續供貨畀我。意想不到地，日本果邊睇完封信之後，竟然真係say yes，開心到我呢！所以，雖然啲茶好貴，但味道咁好咁香，學生一定會好開心、好鍾意，再加埋寫信呢個小插曲，我覺得值得。
講起呢條卷，真係好多回憶。
好多人都唔明白，點解要取消一個咁受歡迎嘅班？因為我覺得，做人要有「見好就收」嘅定力，唔應該貪戀或依賴某一樣嘢，否則，我行邊條路都好，最終只會左搖右擺。同時，若長期處於comfort zone，依賴一樣嘢，人只會愈嚟愈懶。取消一班，我就會有動力去寫另一個更好嘅食譜，就會有衝勁去闖下一個高峰。所以，即使受歡迎，我仍會決定4月後永久取消。
我個人係咪好奇怪？😝
Search